Blue Öyster Cult (exclusive show in Spain)

1967an Long Islanden, New Yorken, sortua, Blue Öyster Cult (BÖC) hard rock-eko talderik eraginkorrenetako bat izan da, rock progresiboa eta letra enigmatiko eta probokatzaileak uztartuz. Haien musikak belaunaldiak gainditu ditu, eta generoan erreferente bihurtu dira, haien sormenagatik eta berezko soinua dela eta. Munduan 25 milioi disko baino gehiago saldu dituzte, eta rockaren historian aztarna ezabaezina utzi dute, abesti klasikoz betetako disko indartsuekin.

Taldea Soft White Underbelly izenarekin hasi zen, baina 1971n, Blue Öyster Cult izena hartu zuen, haien managerra zen Sandy Pearlmanek sortutako mitologian inspiratuta. Haien lehen disko homonimoa 1972an argitaratu zuten, eta ondoren etorri ziren Tyranny and Mutation (1973) eta Secret Treaties (1974) bezalako disko ikonikoak. Hala ere, 1976an, Agents of Fortune diskoarekin, ospe handia lortu zuten, batez ere “(Don’t Fear) The Reaper” abestiari esker. Abesti hori rockaren ereserki bihurtu zen eta zineman eta telesailetan behin eta berriz erabili izan da.

Urteetan zehar, hard rock eta rock progresiboaren historiaren parte bihurtu diren abestiak kaleratu dituzte, besteak beste:

• “(Don’t Fear) The Reaper” (Agents of Fortune, 1976)
• “Godzilla” (Spectres, 1977)
• “Burnin’ for You” (Fire of Unknown Origin, 1981)
• “Cities on Flame with Rock and Roll”, “Astronomy”, “Veteran of the Psychic Wars”, “Black Blade”, eta gehiago.

Taldeak hainbat artista eta letragile ezagunekin lan egin du, Patti Smith, adibidez, “The Revenge of Vera Gemini”-ren idazketan parte hartu zuen, eta musika kritikari Richard Meltzer ere haiekin aritu da. Gainera, Sandy Pearlmanen eragin literarioak BÖC-ren lirika-unibertsoa eraikitzen lagundu zuen, okultismoaren eta zientzia-fikzioaren erreferentzia ugarirekin.

BÖC beste hainbat talderen inspirazio iturri izan dira, besteak beste, Metallica, eta VH1-k denborako hard rock talderik onenen zerrendan sartu zituen.

Musika industriaren bilakaera eta joera berriak gorabehera, Blue Öyster Cult-ek bere lekua mantentzen jakin du. Ia bi hamarkada estudio-disko berririk gabe egon ondoren, 2020an The Symbol Remains kaleratu zuten, eta horrekin beren sormen-gaitasuna eta eragina berretsi zituzten. 2024ko apirilean, Ghost Stories izeneko hamaseigarren estudio albuma argitaratu zuten. Bertan, 1978 eta 2016 artean grabatutako abesti inéditoak eta MC5-ren “Kick Out the Jams” eta The Animals-en “We Gotta Get Out of This Place” bezalako klasikoen bertsioak aurkitzen dira. BÖC beti ibili da etengabeko biran.

Egungo BÖC-ren formazioak jatorrizko kideen esperientzia eta kide berrien talentua uztartzen ditu, taldearen soinua freskatuz:

• Eric Bloom (ahotsa eta erritmo gitarra) – 1970eko hamarkadatik kidea, eta bere eszenako presentziak eta zientzia-fikzioarekiko pasioak taldearen nortasuna definitu dute.
• Donald “Buck Dharma” Roeser (gitarra nagusia eta ahotsa) – “(Don’t Fear) The Reaper” bezalako ereserkiak konposatu ditu, eta bere birtuosismoa taldearen oinarri nagusietako bat da.
• Danny Miranda (baxua) – Queen + Paul Rodgers eta Meat Loaf proiektuetan esperientzia duen musikaria.
• Richie Castellano (gitarra eta teklatuak) – Instrumentu anitzeko musikaria, taldearen soinuari dinamismo berria gehitu diona.
• Jules Radino (bateria, 2004tik) – BÖC-ren erritmo-indarra bermatzen du.

Taldeak bere esentziarekin leial jarraitzen du, bira etengabeak eginez eta belaunaldi desberdinetako publikoa bereganatuz. 50 urte baino gehiagoko ibilbidea izanik, Blue Öyster Cult-ek erakusten jarraitzen du zergatik den rockaren mito handi bat.

“Konturatu ginen rock klasikoaren banda bat ginela. Horixe gara, hori da ondoen egiten duguna, eta egiten dakigun bakarra.” – Blue Öyster Cult